म्हारों राजस्थान रंगीलों प्यारो राजस्थान
वीरा धीरा री या धरती म्हाने गर्व गुमान
चंबल लूणी सान डूनाडा
सूरज नगरी सूर्य उजाला
मंदिर मस्जिद घणा सियारा डगर नगर भगवान
म्हारों राजस्थान रंगीलों प्यारो..........
ढ़ोल डमङ्के बाजे डेरु धरण रुखाले बावन भेरु
चौसठ जोगनियांट फेरु करे रखत अस्नान ।
म्हारों राजस्थान रंगीलों प्यारो.............
आढावात है अढ़िग हिमालों आबू गढ़ चित्तौड़ निरलो
हल्दीघाटी जबरों खालों सुरवीर री खान
म्हारों राजस्थान रंगीलों प्यारो..........
धूल धरा री सोने वरणी रंग बिरंगा वेश संवरणी
ठोड़ ठोड़ झीला मन हरणी लहर लहर ले तान
म्हारों राजस्थान रंगीलों प्यारो..............
धर्म ज्ञान रा गीत उजागर पुष्कर तीरथ राज लुहागर
मीरा मेड़तनी नट नागर रा नित गूँजे गान
म्हारों राजस्थान रंगीलों प्यारो.............
पांख पखेरू भांत भतीला बागा नाचे मोर हठीला
मदिरा चाले ऊंट रंगीला रण बंका री शान
म्हारों राजस्थान रंगीलों प्यारो..............
कण कण मैं कविता किलकारे मरवड मोमल शी सिंगारे
गोरी दर्पण रूप निहारे अग जग सा हैरान
म्हारों राजस्थान रंगीलों प्यारो राजस्थान
